Пожар избувна денес околу 11:00 часот во близина на село Василево, при што огнената стихија зафати стрништа, сува трева и дива депонија.
Веднаш по добиената дојава, на местото на настанот интервенираа екипи на ТППЕ Струмица со четири противпожарни возила и 11 пожарникари-спасители. Благодарение на нивната брза реакција, во тек се интензивни активности за локализирање и целосно гаснење на пожарот.
Поради високите температури и засилениот ветер, постои зголемен ризик огнот да се прошири и на околните површини, поради што пожарникарите остануваат на терен сè додека ситуацијата не биде целосно ставена под контрола.
Надлежните повторно апелираат до граѓаните да бидат максимално внимателни и да не палат стрништа, отпад или сува вегетација, особено во услови на екстремно високи температури. Доколку забележат пожар, потребно е веднаш да го пријават до надлежните служби, бидејќи брзата реакција е клучна за спречување на поголеми штети.
Пожарникарите потсетуваат дека со одговорно однесување секој граѓанин придонесува за заштита на животите, имотот и природата.
Извор:
