Зошто се кандидатирате за општински советник?
- Сакам да ги променам работите во Струмица. Како независен советник во изминатите четири години, „одвнатре“ видов како се носат одлуките и колку често тие зависат од партиски директиви, а не од реалните потреби на граѓаните.
Направив целосно професионално скенирање на сите процеси, актери и ресурси во општината и јасно ги гледам точките каде може да се направи промена и оптимизација.
Знам и што ќе значи ако се не се кандидирам — повторно ќе одлучуваат партиски координатори, „телефонски повици од Скопје“ и симулирани дебати меѓу Курто и Мурто.
Време е да престанеме со тоа. Стига е!
Време е за вистинска политика, базирана на визија и реалност.
Што сте по професија?
- Продуктен менаџер и консултант со над 20 години искуство во ИТ индустријата. Почнав како хардвер сервисер, а потоа преку улоги на бизнис аналитичар, проектен и продуктен менаџер, израснав до консултант со меѓународно искуство.
Дипломирав Електронски бизнис на Економски факултет во Скопје – првата генерација со странски професори од Холандија.
Работев за големи меѓународни корпорации како Thomson Reuters, Tele2, Solera, Seavus и други. Тоа ми даде широк увид и компаративна предност во различни индустрии и системи – знаење што денес го применувам во секојдневните предизвици во одбрана на јавниот интерес.
Кое е вашето најголемо професионално достигнување?
- Слободата и независноста. Успеав да ја изградaм својата кариера без зависност од партиски структури и домашни центри на моќ. Тоа ден денес ми овозможува да зборувам отворено и да делувам со интегритет.
Инаку, горд сум што работев со големи интернационални тимови, што основав и водев неколку компании, и што низ успеси и падови научив највредното — да останам истраен и ефикасен.
Имам работено на повеќе големи проекти поврзани со опслужување на големи интернационални клиенти и чија вредност надминуваат многу стотици милиони долари годишно. Во Македонија како консултант имам работено со поголеми приватни фирми и неколку министерства, а волонтерски учествував во повеќе работни групи на министерства што на крај резултираше со успешна измена на три закони.
Зошто сметате дека со оваа позиција ќе можете да промените нешто?
- Советничката функција е најниското, но највлијателното ниво каде граѓанинот може директно да влијае врз одлуките. Независниот советник не должи ништо на партиите — само на граѓаните.
Ако се остварат аналитичките прогнози базирани на реална статистика и испитување на теренот што значи „Стига Е“ да добие 3–4 советници, тогаш ќе има реална и независна контрола врз градоначалникот и администрацијата.
Партиите ќе мора да работат ефикасно, транспарентно и ќе „играат во тепсија“ исклучиво за интересите на граѓаните.
Граѓаните добро знаат што значи кога едно советничко мнозинство е партиски контролирано како до сега.
Затоа треба да се прекине тој монопол и да се воспостави вистинска рамнотежа во интерес на локалната заедница, наместо да се симулира сценарија со истите партиски елити од позадината. Во што е разликата ако партиските коалиции се истите елити?!?
Што најмногу ве провоцира и сакате да го промените?
- Менталитетот дека „ништо не може да се смени“. Може – ако Советот има луѓе кои не се плашат да застанат против партиски притисоци и да ја повикаат јавноста на нивна страна.
Ние ќе покажеме дека може да се функционира без коалиции и без партиски диктати. Да, ќе има многу подолги седници на совет каде ќе мора да се мерат аргументи наместо диригирана партиска трговија, но и вистински резултати за граѓаните.
Ова е можно во Струмица – покажаа тоа и нашите сограѓани во 2024 кога слободно гласаа за политичката партија Аваја и ги изненадија двете големи партии во Струмица кои вложуваа огромни средства и енергија за агресивна агитација. Епилогот на крај беше 1000 гласови за Аваја и никакви негативни последици. Значи можело, но треба само храброст и излезност.
За што конкретно ќе се борите?
- За индивидуално гласање и одговорност на секој советник, без партиски директиви. Советниците на Стига Е ќе бидат клучни за секоја одлука во Советот и со директен пример ќе покажат како може да се работи без позадински куклари.
Фокусот ми е на екологија, оперативна ефикасност на администрацијата и финансиски одржлив развој на општината – според реалните можности, а не партиските ветувања и пазарења.
Сакам Советот на Струмица да стане модел за транспарентно и професионално локално управување.
Како ќе се опишете, каков човек сте?
- Смирен и скромен, но гласен, строг и праведен кога треба. Не сакам конфликти, но не бегам од нив, а особено не ако се во одбрана на јавниот интерес.
Што читате?
- Главно стручна и техничка литература и истражувања потребна за проектни активности во работата, па документи и материјали потребни за седниците на работата Советот и општината, повремено материјали и извештаи поврзани со закони и извештаи од парламентот и министерствата.
Во слободно време – филозофија, духовност, наука и фантастика. Ме инспирираат Аврелиус, Платон, Достоевски, Толстој, Берѓаев, Херберт, Толкин…
Колку книги имате дома?
- Имам мини-библиотека наследена од родителите и дедовците па низ годините ја проширувам и надополнувам. Читам од дете – првата книга ми беше илустрирана библија, а потоа енциклопедии, списанија и сè што ми доаѓаше при рака. Дигиталните книги и списанија сега се актуелни и распространети, но ништо не ја заменува книгата во рака.
Какви филмови гледате?
- Ретко имам време, но кога гледам – научна фантастика, хорор, авантура и акција.
Топ 3 омилени филмови:
- Матрикс – за визијата на реалност и контрола.
- Кум – за одлуките, перцепцијата и лојалноста.
- Господарот на прстените – за храброста и надежта во борба за подобар свет.
Имате ли омилени места за патување?
- Поради работата доста патував и повремено живеев на разни места во Европа и САД па би ги издвоил Рим, Берлин, Њујорк, Мадрид… Секое има своја енергија и убавина.
Каква музика слушате?
- Главно рок од 70-тите и 80-тите, повремено класика. Од домашна музика би издвоил Архангел и Мизар.
Што ви се допаѓа во градот? Со што се гордеете?
- Струмица има нешто што ретко каде го има – живост и душа.
Имаме прекрасна клима, блискост до море и планини, вкусна храна, безбедна средина, живописни историско-културни одбележја и секако прекрасен парк.
Гордам се со нашата локална култура, традиција и наши Струмичани кои ја претставуваат градот со чест и углед.
Каде може да ве сретне човек во градот?
- Најчесто на прошетка низ паркот, корзото, повремено во кафе и културен настан. Во недела – на литургија. Тоа ми е време за мир и рефлексија. Често знам да пешачам по улиците на градот.
