Советот на Општина Струмица ја одржа својата втора седница, на која клучни точки на дневниот ред беа ребалансот на буџетот, кварталниот извештај и развојната програма на Општината за 2026 година.
И покрај тоа што документите беа усвоени со огромно мнозинство гласови од советниците на ВМРО-ДПМНЕ и СДСМ, седницата ја одбележа активната дебата покрената од советничката на Левица, Јасмина Пијанманова, која беше единствената што дискутираше по точките.
Според Пијанманова, предложениот ребаланс на буџетот е направен исклучиво за да се обезбеди исплата на плати за јавната администрација и за привремено вработените. Таа обвини дека ова се прави директно на штета на граѓаните, со кратење на средства од програмите за јавна чистота и животна средина.
„Ребалансот не обезбедува средства за капитални инвестиции, туку се сведува само на покривање тековни трошоци“, истакна Пијанманова.
Критики беа упатени и кон развојната програма за 2026 година. Советничката на Левица посочи дека фокусот повторно е ставен само на градот, додека околните населени места остануваат целосно запоставени.
Таа додаде дека програмата не нуди никакви решенија за најгорливите проблеми со кои се соочува општината, како што се алармантното загадување на воздухот и обезбедувањето квалитетна вода за пиење, кои, според неа, се врвни приоритети за граѓаните.
И покрај укажаните забелешки, ребалансот на буџетот и развојната програма беа изгласани. Од Левица соопштија дека за нив овие документи се неприфатливи бидејќи не ги следат вистинските потреби на општината и дека партијата останува доследна на своите програмски принципи.
