По повод големиот христијански празник Св. Троица (Духовден), на 31 мај 2026 година во селото Дабиле успешно се одржа првото издание на крос-трката „Мое Дабиле-Св.Троица 2026“, во организација на новоформираното Здружение на граѓани „Мое Дабиле“ и со несебична поддршка од локалните фирми и поединци. Овој настан означува возобновување на една стара локална традиција и има за цел поттикнување на спортскиот дух, здравите навики кај децата и младите, како и зајакнување на заедништвото во селото. Манифестацијата помина во одлична атмосфера и со масовен одзив од сите генерации, а особено впечатливи беа најмладите учесници кои со стартни броеви и насмевки ги претрчаа своите патеки под громогласен аплауз на бројната публика која ги бодреше тркачите долж целата траса.
На кросот се трчаше во четири возрасни категории на патеки од 400, 1000, 2000 и 4000 метри, при што учеството беше целосно бесплатно, а сите натпреварувачи добија маици од организаторот. Додека најмалите до 10 години беа наградени со медали за нивниот спортски дух, во останатите категории беа доделени медали, дипломи и парични награди во машка и женска конкуренција. Како севкупен победник во генерален пласман и прв на патеката од 4000 метри се издвои Столе Танчев, кој покрај спортските признанија доби и специјална награда – Икона на Св. Троица. Задоволството кај учесниците, публиката и организаторите јасно потврдува дека оваа манифестација има огромен потенцијал да прерасне во традиционален годишен настан за Дабиле.
Извор:
– Facebook страна „Мое Дабиле“
