Петре Арсовски е овогодишниот добитник на престижната награда „Голема ѕвезда на македонскиот филм“. Ова признание, кое традиционално го доделува Друштвото на филмските работници на Македонија (ДФРМ), му се доделува за неговиот исклучителен и траен придонес кон развојот на македонската кинематографија.
Според соопштението од Министерството за култура, наградата на Арсовски ќе му биде врачена на свеченото отворање на Интернационалниот фестивал на филмската камера „Браќа Манаки“, кое ќе се одржи на 19 септември во Битола.
Тој остави значаен белег остварувајќи забележителни улоги во култни македонски филмови, меѓу кои се вбројуваат: „Македонскиот дел од пеколот“, „Јад“, „Среќна Нова ’49“, „Тетовирање“, „Џипси меџик“, „Големата вода“, „Бал-кан-кан“, „Трето полувреме“ и многу други.
Со доделувањето на оваа награда, ДФРМ официјално му оддава достојна почит на доајенот на македонското глумиште за неговиот непроценлив влог во филмската уметност.
