Утревечер, со почеток во 20 часот во просториите на Младинскиот културен центар во Струмица, ќе се одигра монодрамата насловена „Не денес“. Овој уметнички проект е подготвен како заедничка соработка помеѓу граѓанската организација „Еко-свест“ и познатиот актер Марјан Георгиевски, со цел преку театарската игра да се подигне гласот против аерозагадувањето и општествената пасивност.
Претставата носи силна и директна порака за еколошката состојба во земјата, а Георгиевски преку својот настап го адресира проблемот со согорувањето на јагленот како „тивок убиец“ на нашето здравје. Актерот предупредува дека институционалната летаргија и граѓанскиот молк во однос на загадувањето се неодржливи, нагласувајќи дека прифаќањето на рамнодушноста по цена на сопствениот живот е долг кој не смееме да им го оставиме на идните генерации.
Организаторите ги повикуваат сите заинтересирани граѓани на 9 јуни заеднички да ја проследат оваа изведба која ја спојува уметноста со активизмот. Влезот за настанот во МКЦ Струмица е бесплатен за сите посетители.
Извор:
– Facebook страна Еко-свест
