Секторот за внатрешни работи Струмица поднесе кривична пријава до Основното јавно обвинителство против една локална компанија и нејзините двајца управители, поради сомневање за сторено кривично дело „даночно затајување“.
Пријавата се однесува на правното лице од Струмица и управителите В.Ј. (35) и С.П. (44), кои се товарат дека свесно го оштетиле државниот буџет за да се стекнат со противправна имотна корист.
Според информациите од полицијата, пријавените во текот на 2024 година поднесувале даночни пријави до Управата за јавни приходи (УЈП), но намерно го избегнувале плаќањето на утврдените суми.
Станува збор за неплатен Данок на додадена вредност (ДДВ) во два клучни периоди:
- Април – Јуни 2024: Долг во износ од 1.340.048 денари.
- Октомври – Декември 2024: Долг во износ од 8.691 денари.
Пријавените, со цел да се стекнат со поголема имотна корист, ги поднесувале пријавите до УЈП, но не го уплаќале данокот на соодветните сметки, со што го оштетиле Буџетот на Р.С. Македонија за вкупен износ од 1.348.739 денари, стои во соопштението на СВР Струмица.
Делото е квалификувано според член 279 од Кривичниот законик. Доколку се докаже нивната вина, на управителите им се закануваат затворски казни, како и парични санкции за правниот субјект, согласно тежината на сторената штета врз јавните финансии.
Случајот сега е во рацете на надлежното обвинителство кое треба да покрене понатамошна постапка.
Извор:
– Facebook страна на МВР
