Под мотото „Знаењето се вреднува, успехот се наградува“, синоќа во просториите на Младинскиот центар се одржа свечен настан на кој градоначалникот Петар Јанков им ги додели стипендиите на најуспешните ученици од општинските основни и средни училишта, вклучувајќи го и ДСУ РЦСОО „Никола Карев“. Изборот на добитниците беше извршен преку јавен повик објавен во декември 2025 година, при што Комисијата ги рангираше најдобрите кандидати согласно правилникот за доделување стипендии за наставната 2025/2026 година.
Вкупно 23 ученици од средните училишта ќе добиваат месечна стипендија од 2.500 денари, додека 28 ученици од основните училишта ќе примаат по 2.000 денари во времетраење од девет месеци. Покрај финансиската поддршка од општина Струмица, на настанот беше истакната и соработката со Фондацијата „Нова Генерација“, која дополнително обезбеди уште 10 стипендии за средношколци и 13 за основци во истите износи. Со оваа иницијатива, локалната самоуправа и партнерските организации уште еднаш ја потврдија својата заложба за поттикнување на образовниот процес и наградување на трудот на младите таленти во заедницата.
Извор:
– Веб страна на Општина Струмица
