Секторот за внатрешни работи Струмица поднесе кривична пријава до Основното јавно обвинителство против поранешен градоначалник на Општина Струмица и уште пет лица, поради сомневања за сериозни злоупотреби при набавката на електричните автобуси за јавниот превоз во градот.
Според полицискиот извештај, станува збор за набавка вредна речиси 430 милиони денари, при која наводно бил наместен тендерот и ангажирани лица без соодветни квалификации.
Полицијата ги товари пријавените за неколку кривични дела:
- К.К. (35) од Струмица (Поранешен градоначалник): Осомничен за „злоупотреба на постапката за јавен повик, доделување на договор за јавна набавка или јавно-приватно партнерство“.
- Д.П.С. (61) од Струмица (Директор на ЈСП „Струмица-Транспорт“): Осомничен за „несовесно работење во службата“.
- К.Б. (37), Л.Ј. (63) и Л.Ѓ. (62) (Членови на комисијата за јавни набавки): Осомничени за „несовесно работење во службата“.
- Г.П. (58) од Скопје: Осомничен за помагање во извршувањето на горенаведените дела.
Истрагата покажала дека првопријавениот К.К., во својство на градоначалник, ги прекршил правилата за јавна набавка. Тој се товари дека во договор со лицето Г.П. ги креирал тендерските спецификации така што тие „недвосмислено и речиси идентично“ одговарале на спецификациите на точно определени електрични автобуси, со што била фаворизирана конкретна понуда.
Дополнително, за техничка евалуација и надзор на имплементацијата бил ангажиран Г.П., иако тој не поседувал Лиценца А за надзор од областа на електротехниката, туку само Лиценца Б, што го прави неквалификуван за ваков тип на голем проект.
Директорот на ЈСП „Струмица-Транспорт“, Д.П.С., се товари дека на 12.03.2024 година го потпишал договорот за набавка на 10 автобуси преку финансиски лизинг, пропуштајќи да изврши должен надзор и дозволувајќи во постапката да учествува неквалификувано лице.
Членовите на комисијата (К.Б., Л.Ј. и Л.Ѓ.) исто така дозволиле Г.П. да биде одговорен за следење на реализацијата, иако тој немал законско право да одговара на технички прашања или да врши евалуација на понудите.
Вкупната вредност на набавените 10 електрични автобуси изнесува 429.933.595 денари (околу 7 милиони евра).
Извор:
– Facebook страната на МВР
