Во денешно време кога оброците ни се воглавно брзи, процесирани и полни со шеќери се почесто се појавува проблемот со инсулинска резистенција односно неспособноста на организмот да го регулира нивото на шеќерот во крвта.
Преголемата конзумација на ултрапроцесирани шеќери и јаглехидрати и неактивниот начин на живот се главните причинители на овој проблем.
Постојат неколку едноставни навики кои лесно можеме да ги применуваме во секојдневниот живот без да мораме целосно да се откажеме од нашите омилени јаглехидрати и десерти, а сепак да му овозможиме на нашиот организам полесно да го регулира шеќерот и да ги избегнеме постојаните глукозни ,,скокови” и ,,падови” кои влијаат на нашето здравје и енергија.
1. Денот започни го со солен појадок. Појадокот треба да вклучува здрави извори на протеини и масти (месо, риба, јајца, авокадо, грчки јогурт…). Избегнувај појадок со премногу јаглехидрати (шеќер и скроб). Наместо чаша цеден портокал и житарици или овошно смути со кроасан или гранола, одбери јајца, авокадо и јогурт. Мастите и протеините пополека се разградуваат во крвотокот, па не водат до нагло качување на нивото на шеќерот и ни даваат рамномерна и постојана енергија во текот на денот. Едноставните јаглехидрати пак водат кон нагло покачување и нагло паѓање на шеќерот во крвта, а со тоа имаме и падови во енергијата и почесто чувство на глад. Појадокот е оброкот кој воглавно ни го диктира нивото на енергија и гладот во текот на целиот ден.
2. Оброкот конзумирај го во следниот редослед: прво храна богата со растителни влакна (зеленчук, салата), второ протеини и масти, а јаглехидратите (леб, компир, ориз, благо) остави ги за крајот. Истражувањата покажуваат дека доколку оброкот се јаде во овој редослед покачувњето на шеќерот може да се намали дури до 75 %.
3. Не јади ,,голи” јаглехидрати. Овошјето комбинирај го со јатки, путери од јатки или грчки јогурт. Тестенините комбинирај ги со месо или јајца. На овој начин побавно се ослободува гликозата со што се намалува покачувањето на шеќерот.
4. Движи се после секој оброк. Движењето е исто така важно за регулирањето на нивото на шеќерот во крвта. Доволно е кратка прошетка од 15 минути за значително да се намали покачувањето на шеќерот после оброкот. Било какво движење и користење на мускулите помага- чистење на домот, танцување на омилената песна или движење низ домот додека слушаш музика.
5. Имај 2-3 оброци дневно без грицкање помеѓу оброците. Секогаш кога јадеме било што, нивото на шеќерот се покачува, а потоа опаѓа. Колку почесто јадеме и грицкаме толку имаме и почести глукозни скокови и падови, а тоа може да ја влоши инсулинската резистенција. Затоа конзумирај само 2-3 оброци дневно богати со сите потребни макронутриенти- растителни влакна, масти, протеини и комплексни јаглехидрати.
