Месечината изгледа како еден од најнепријателските светови за живот.
Нема атмосфера како Земјата, температурите се екстремни, површината е изложена на силно зрачење, а во многу области условите се сурови до крајност.
Но една нова студија предводена од NASA покажува нешто неверојатно:
некои микроорганизми од Земјата би можеле да преживеат под одредени услови на Месечината.
Научниците испитувале пет групи микроорганизми и симулирале услови какви што би можеле да постојат во некои засенчени области околу јужниот пол на Месечината.
И резултатите биле изненадувачки.
Еден од најотпорните организми бил Aspergillus niger – габа која може да се сретне и во нашата животна средина.
Истражувани биле и други габи и бактерии, меѓу кои Deinococcus radiodurans, познат по својата исклучителна отпорност на радијација.
Но важно е да се разјасни нешто:
Научниците не откриле живот на Месечината. Тие покажале дека одредени микроорганизми од Земјата можат да останат живи најмалку одреден период под симулирани лунарни услови.
Во ова истражување, „преживување“ значи дека микроорганизмот останува жив најмалку еден земјин ден. Тоа не значи дека може таму да расте, да се размножува или да создаде колонија.
Но тогаш се појавува едно многу интересно прашање.Како би можеле земски микроорганизми да стигнат до Месечината?
Со луѓето. Секој човек носи огромен број микроорганизми, а дури и со строги процедури за стерилизација, невозможно е целосно да се елиминираат сите микроорганизми од човечките мисии и опрема. Тоа значи дека идните човечки мисии би можеле ненамерно да пренесат дел од животот од Земјата на други светови.
NASA токму затоа ја проучува оваа можност – за подобро да се спречи биолошка контаминација и полесно да се разликува она што природно постоело на некое небесно тело од она што го донеле луѓето.
А ова станува особено важно со плановите за идни човечки мисии на Месечината. Замислете еден ден научниците да откријат микроорганизам во лунарен примерок.
Дали е тој навистина месечев живот?
Или можеби потекнува од Земјата и пристигнал таму со некоја човечка мисија?
Токму затоа ваквите истражувања се важни. Не само затоа што ни покажуваат колку е отпорен животот.
Туку затоа што нè предупредуваат дека кога човекот ќе почне да ги истражува другите светови, не патува сам. Со нас патуваат и милијарди невидливи сопатници- микроорганизми.
А можеби токму тие ќе бидат првите „земјани“ што ќе остават трага на друг свет. Дали иднината на истражувањето на вселената ќе биде и приказна за тоа како животот од Земјата патува со нас?
Фотографија:Shackleton Crater, јужен пол на Месечината — LROC/ShadowCam, NASA/KARI/ASU. Public Domain.
Извори:
-NASA Science – Human-Related Microbes May Survive Moon’s South Pole, NASA Finds
-Reuters – NASA-led study shows some Earth microbes could survive on the moon
-Science Advances
