Во текот на изминатиот викенд (17/18 октомври), Одделот за криминалистичка полиција во содејство со Секторите за внатрешни работи и повеќе инспекциски служби спроведе обемна акциска контрола во 66 угостителски објекти и казина ширум државата, при што се откриени низа законски прекршувања и неправилности.
Според официјалните информации од Министерството за внатрешни работи, при полициските активности биле легитимирани 38 лица, извршен бил преглед над 61 лице и едно патничко моторно возило, додека идентитетот му бил утврден на 31 лице.
При теренските контроли во еден угостителски објект било затекнато лице кое вршело дејност обезбедување без потребната лиценца и легитимација, додека во друг објект било евидентирано нарушување на јавниот ред и мир. Исто така, полицијата изрекла три глоби за непочитување на Законот за заштита од пушењето.
За време на акцијата, едно лице било приведено поради одбивање да се легитимира пред овластените службени лица, а приведени се и три странски државјани поради нерегулиран престој во државата.
Контролите кажаа стоп и за непочитувањето на прописите за заштита на младите. Во еден од контролираните објекти се затекнати четири малолетни лица по 24:00 часот, додека во два објекти е констатирано точење алкохол на малолетници.
Во рамки на истата акција, полициски службеници од ОВР Кичево извршиле претрес на локација каде што неовластено и незаконски се приредувале игри на среќа. На лице место биле затекнати две лица, а биле конфискувани и предмети поврзани со кривичното дело. По целосно документирање на случајот, против инволвираните ќе следува соодветна пријава.
Покрај полицијата, во обемната акција учествуваа и Државниот пазарен инспекторат (ДПИ), Управата за јавни приходи (УЈП), Државниот инспекторат за труд (ДИТ), Дирекцијата за заштита и спасување (ДЗС), како и Агенцијата за храна и ветеринарство (АХВ). За сите утврдени неправилности надлежните инспекциски служби веднаш презедоа соодветни законски мерки и санкции.
Од МВР порачуваат дека засилените и координирани контроли во угостителските објекти и казината ќе продолжат со исто темпо и во наредниот период, со цел да се сузбие нелегалното работење, да се обезбеди доследно почитување на законите и да се подигне нивото на безбедност на сите граѓани.
Извор:
– Facebook страна на МВР
