Двајца државјани на Сирија, на возраст од 22 и 29 години, се осомничени дека предизвикале пожар во Прифатниот центар за баратели на меѓународна заштита во Нови Загреб, откако, според информациите на хрватската полиција, биле незадоволни од условите за сместување.
Инцидентот се случил во петок, а според истрагата, осомничените со употреба на отворен пламен, на засега неутврден начин, ја запалиле вратата од една од собите во објектот.
Од Полицијата во Загреб соопштија дека со овој чин била создадена сериозна опасност по животите на останатите баратели на меѓународна заштита, вработените во центарот, како и по самиот објект и имотот.
По завршувањето на кривичната истрага, двајцата осомничени биле приведени и предадени на надлежниот притворски орган, а против нив е поднесена кривична пријава до државното обвинителство поради сомнение за сторено кривично дело – загрозување на животот и имотот со општо опасно дејствие или средства.
Случајот повторно ја отвори јавната дебата во Хрватска за безбедносните аспекти на миграцијата, функционирањето на прифатните центри и одговорноста на институциите во вакви ситуации.
